الخميس، 25 سبتمبر، 2008
رسالة إلى السيد غلاء مبارك
رسالة إلى السيد غلاء مبارك ... أرجوك أرحمنا ...!!1

ملحوظة... تلك البقعة الصغيرة التي تعتلى حرف العين ...(والمكناه بالنقطة ) ليست سهوا أو خطأ إملائيا
اكتب إليك يا سيدي.. كي أبث شكواي..وهي ليست شكواي وحدي...بل شكوى الملايين ....المهروسين زي البطاطس البوريه بشوكة الغلاء ...المضروبين في خلاط الحياة... المطحونين فيها بأيد هون المرتبات
معاليك الحال ميسرش لا عدو ولا حبيب .... والغلا اثر على كل حاجه...حتي على فحولة الرجال فى غرف النوم...وانا متأكد ان ده ميرضيش حضرتك...!! 1
وبعدين معاليك...احنا ياما وقفنا مع السيد الوالد..(القائد والزعيم يخليهولنا و يخليلنا جميع الزعماء)...طب حضرتك أسأله ..وكل مايقول نشد الحزام بنشده...يقول نعدل الدستور نقول حاضر...نعدل الماده 79سمعا وطاعه...هنشيل قانون الطواريء...اوكي نشيله....معلش هنرجعه تانى وماله مقلناش حاجة
الموضوع معاليك ان كيلو اللحمه ...بقي أغلى من ورقه البانجو.. وشوف معاليك الورقه بتعمل كام سيجاره..يعني الكيف بقى أغلي من المم جنابك..احنا مش بنتبتر...(معاذ الله ) احنا بناكل العيش بدقه وبنحمد ربنا ونبوس ايدينا شعر ودقن ونقول وأقل من كده يرضى...بس جنابك عارف ازمة العيش دلوقتي.. وبعدين الحقيقه مفيش أقل من كده
معاليك على سبيل المثال...والدي الله يرحمه كان موظف في مصلحة الضرائب العقارية ... خدم البلد دي 30سنه (هي مدة خدمته الى ان توفاه الله ) عارف حضرتك مكافأة نهاية الخدمه طلعت كام 5الاف جنيه ... اكيد حضرتك مش هتصدقنى ....لأ ومش بس كده...تخيل بنقبض معاش كام....450جنيه بعد 30 سنه خدمة
والله أنا لا ثورجي ولاشيوعي... لتفهمني غلط معاليك... واخر علمى بمعني الاضراب... هو ان 49 حاصل اضراب 7 فى 7 ....او في رمضان مدفع الافطار إضـــــــراب... وعلى فكره معمريش ذهبت الى المحله... 1
الموضوع وما فيه.... ان لو جيبنا اينشتين علشان يحل المعادله الصعبه دي... معادلة المرتب والمصاريف.... كان هيجيبله تساقط شعر... ويموت زلبطه معاليك...وده ميرضيش حضرتك
وأنا في خطابي ده لمعاليك هحاول -ده بعد اذن معاليك طبعا-... أقترح بعض الحلول
يعني انا بقترح علي سموك... لوبعنا الغاز لاسرائيل أزيد ربع جنيه في الوحده...اكيد هيجمل معانا ونسد بعض العجز في الميزانيه ..أو حتي ممكن نغلية شويه ونبيعه زي ما بنبيعه للمصريين
او في قانون الضرائب الجديد... ممكن نعلي الضرائب شويه علي المحتكرين والمتربحين... واهو البحر عمره ما هيخس
أو حتي ممكن معاليك...............! 1
معاليك الازمه باختصار...علشان وقت حضرتك...ان احنا عايزين ناكل كويس... ونشرب كويس... ونتعلم كويس... ونتعالج كويس.... ولما نموت نموت موته كويسة . 1

posted by Mahmoud Badawy @ 8:43 م   3 comments
السبت، 6 سبتمبر، 2008
الفرق الشاسع
الفرق الميتافيزيقي.. التوسعي... الامبريالي... الانبطاحي بين جنب الحيط وجوة الحيط.!!1



من يوم ما اتظلت في الدنيا دي .... وأنا بسمعها كل يوم تقريبا من الأهل والأقارب والجيران حتى من العبقرية أمينة رزق ( يأبني.. أمشى جنب الحيط) كل اللي حولي بيهتفوا هذا الهتاف المقدس كالجوقة في المسرحيات القديمة " أمشى جنب الحيط وقول ورانا علشان نتأكد انك هتمشى جنب الحيط "
" خيط حرير على حيط خليل "
- نعم....!! حيط خرير على خيط خليل
- شفت قوووووووول من الأول تاااااااااانى
- خيط خليل على حيط خرير .....يوووووه !! بقول إيه أنا حوده شقاوة محدش يقول لي أعمل إيه... أنا بعمل اللي على مزاجي وبعدين أنا بحب أمشى في نص الشارع ... وزرارين تلاته من القميص يكونوا مفتوحين... ده إن كان عاجبكم
جاء صوت الجوقة من جديد " أنت حر إحنا حذرنــــاك"

بووووووووم........طااااااااااخ....... بووووووم
ماله جنب الحيط ... ما الشارع كله قدامى فاضي اهه ..... والناس ماشيه تتمسح في الحيطان اللي بقت مقامات علشان تأخذ منها البركة ...أنا اللي استاهل عملت فيها دون كيشوت ...!! سامحيني يا أمي ... ياما قولتيلى ومسمعتش الكلام .... من هنا ورايح كتفي هيعلم على كل حيطة في البلد...ومش بس كده... ده أنا هلبس بروفل برقبة....!! 1

وأنا ماشى جنب الحيط... وكتفي انقطع من عليه كم البروفل من قوة الاحتكاك بين مكابح كتفي اليمين والأرض الأسمنتيه المنقرة للحيط....ماهو على رأى المثل (اللي يتلسع على قفاه من الأمن .... يحك في الحيط)... كان أول من اعترض طريقي ...خلق ...خلق ياما ضهرهم ساند على الحيط متكومين وفوق كومة اللحم اللي غالبا ما بتبقى ناقص منها حته وضايع منها المعالم ...ايد ممدودة... تستني الفرج في ربع جنيه مخروووم....وأى خرررم

مشيت فى وشى وقلت يا واد طنش خاااااااالص .... وبعد شويه قابلت واحده سانده ضهرها بردوا على الحيط ... كوم لحم بردوا... بس للأسف لحم رخيص... كانت فتاة ليل وبردوا كانت ضايعة المعالم ...بس المرة دي من فجاجة الماكياج ...وكانت عماله تنده على وتبس بس
قمت نونوت على طول .... وقلت يا واد طنش خاااااااااااالص
مفيش على بعد أمتار قابلت شباب بيشربوا مخدرات ... بس المرة دي مش هم اللي كوم لحم ... أنا اللي كنت هتكوووم لما شافوني ... هما كانوا بردوا ضايعين بس مش ( المعالم بس )... قالي واحد منهم شاهرا سلاحه الأحمر ( أصله كان لسه مخلص خناقه...!! ) 1
- شوف يا عم الصرصار ... لمؤاخذه أصلى مش شايف دلوقتي غير الصراصير...لو فتحت أي حاجه ... هقورك زى صوبع الكوسة أبو خمسه جنيه الكيلو ... إياك تجيب صوره لأي حد... أنت فاقس .... حط لسانك جوه فردة الجذمه واتكل لأفرمك مع البصل والبرغل ... صباح الفل
أخذت منه عقب السيجارة... وقلت يا واد طنش خاااااااااااالص
بعد كده قابلت كوم لحم ...بس أكوام صغيره ... ( أطفال الشوارع )... بنات صغيره من سن 13 لــ 15 تقريبا ... شايلين أخوتهم الصغيرين على أيديهم....بس الغريبة أنهم كانوا بيرضعوهم .... بس اللي أغرب من كده معقول كل علب الكولة اللي في أيدين الأولاد دي...دول أكيد شغالين في مصنع جذم ولا يمكن ..............!!!! 1
أنا قلت يا واد طنش خااااااااااالص
بعد كده في رحلتي حول الحيط ...وكتفي كان قرب يتنحل.. وعظمة الترقوة ترشق في القفص الحديدي .... يوووووه قصدى الصدري بتاع حضرتي...قابلت كوم لحم بردوا .... بس المرة دي هبر يا مولانا .... مرمية جنب فندق نجومه خمسه وخميسه في وش الحاقدين من امثالى.. وبصراحة كنت هموت من الجوع ....لولاش افتكرت الخمسة وخميسه صوابع المعلمين على قفاي.... رحت على طوووول قلت يا وااااد طنش خااااااااالص

الشرارة الناتجة من احتكاك الحيط بعظمة الترقوة (هو مش اسمها كده بردوا) خلت الشاب الملتحي اللي كان بيعلق لافته مكتوب عليها الإسلام هو الحل .... يفتكرني عسكر من المعسكر ... وإن الشرارة دي من الصاعق الكهربائي... قام فص ملح وداب
بيني وبينكم .... كانت الافته من لهوجته نصفها بس اللي اتلزق ...قام كفى ( الهي يتشل ) بحركة لا اراديه والله العظيم... وده اللي حاولت اقنع بيه سيادته ومقتنعش ...يعدى علي الافته علشان يلزقها
بووووووم ....طااااااااااااااااااخ....بووووووووم
-اللي تشوفه معاليك يا باشا هو اللي هيمشى والله ...وأنا مستعد اسيب قفاي هنا كدليل على حسن النية... ده أنا حتى كنت مااااشى جنب الحيط
- معدش يا روح الست دي أمك ...من هنا ورايح تمشى جوه الحيط ... وخد بالك الحيطان لها ودان

وأثناء رحلتي الميمونة جوه الحيط... قابلت السيد طوب ، اللي قالي متبصليش بعين رضيه بص للمدفوع فيه .... وحرمه السيدة اسمنت اللي الطن منها شوف يعمل كام دلوقتى (وتدعي مونه حاليا بعد ما اختلطت بالماء الملوث وجابت للطوب فشل طوبى) 1
وأول عيني ما وقعت على مولاي الأمير حـــديــد.... سمعت صوت البندوزر بيهد في الحيطه
قلت يا وااااد طنش خااااااااااالص
- أنت تاني مفيش فايدة فيك... محرمتش
بووووووم ..... طااااااااخ .....بووووووم

posted by Mahmoud Badawy @ 8:13 م   5 comments
الأحد، 31 أغسطس، 2008
حامل المصباح ... خـاطرة
حامل المصباح

أفتح عيني ...1
لا أعرف أين أنا ...1
فقط ظلام حالك ...1
أتكلم فأجد الرد صداً ...1
ينزف الدم مني ...1
جرح قديم غائر ...1
أحاول أن أبحث عن مساعدة ...1
أن أجد الطريق ...1
فلا أجده أبداً ...1
وفي وسط المشاق إذ برجل عجوز بشوش الوجه أبيض الثياب بسام المحيي ...1
يحمل مصباحاً ...1
نظرة حانية مشرقة ...1
أعطاني المصباح ...1
أخرج الدواء ...1
وعالج جرحي العميق الذي ظننت أن لا علاج له .1
أشار إلي بعد أن انتهى بسبابته ...1
وقد تغيرت ملامح وجهه ....1
أنا رمضان ...1
لا تدعني أمر دون أن تنل من مروري أجر ...1
وإياك أن تعصي الله في ...!! 1
1" هه .... مــــــ ... من ..مــن !!! أين ذهبت "1
اختفى الرجل ...1
وبقى المصباح ...1
والجرح المضمد .1

بقلم / البلياتشو الحزين

محمود بدوي

posted by Mahmoud Badawy @ 2:26 م   2 comments

Name: Mahmoud Badawy
Home: Egypt
 
See my complete profile
الإدراجات السابقة

رسالة إلى السيد غلاء مبارك

الفرق الشاسع

حامل المصباح ... خـاطرة

الأرشيف

أغسطس 2008

سبتمبر 2008

مدونات صديقة

إنسـى

خربشة غريب

 أبو مفــراح

شباب بجد

مواقع صديقة

إسلام أون لاين

طريق الإسلام

عمرو خالد

الجزيرة نت

  web counter
web counter